Vasteloaves Joeksereij i Welte!

Mondig 11 fibberwaar is t wér zoeë wiet, vanaaf 12.30 oer vuur ’t Patternaat i Welte sind v’r werrum paraat mit de zoeëveulste oetveuring va Vasteloavend Same. Vasteloavend Same inne kloep va vasteloaves gekke die d’r vasteloavend wér truuk bringe wao hé oets vuur gemind woar. Same vasteloavend viere oane behei en hollendsj gesjrei. ‘t Mak neet oet weëste of watse bis wentse mar doa bis mit ing sjpass moel.

Hasze evvel ee lank gezich, da blief lekker heem, legk dich mit ‘t zap apparaat op de bank of gank get sjaatse op d’r Welterviever. Vasteloavendsvrung va Welte vurrech joar sind werrum ee paar luuij geweë die zich neet hant weete te gedraage en ee paar van os buure ueverlas bezurgd. Wille v’r evvel mit dit vasteloaves fés op d’r mondig durrech kinne goa zalle v’r os och mit respek vuur  d’r angere motte benumme.

Vier dont och ee beroop op uch verantwoordelikheed en hoape dat d’r mit os de ooge oape hót en went ut nuëdig is korrigerend op treënd. Ja en da noe noa t program. ’t Is werrum genauw ‘t zelfde wie al die joare vuuraaf. D’r k.k. de Woeësjbuulle zint werrum paraat mit d’r Sjeng der Ieësjte. Hé hat och dit joar wer ligke zeeke um d’r mit op te hure en ins inne angere knuppel prins te maake.

V’r hant evvel lang motte zeuke want zoeë profiel wie d’r Sjeng dé  mot noch geboare weede. Noa lang zeuke zint v’r oetindlich oetgekoame beij d’r Guus Huune i Bensroa. In d’r verkessjtal- doa hant v’r um zie ligke, d’r voele beer. Veer puuët, inne kop wie inne riethamer, ee paar sjinke doa kinste ee gans durrep mit voare en da dat lief. Mieljaar wenste uever ee vet verke kals da houwe v’r dat heij vuur os ligke.

Es profiel vuur d’r nuije prins van de Woeësjbulle pasde heë genau. Zoeë sjtom wie ee verke, zag neet al te veul, ee diek lief, druueg oet de ooge kieke en koet onnoch 5 minuute op de puuët blieve sjtoa. Mér v’r houwe ee probleem en dat woar de patsj mit veere. Dé pasde neet op deë vérkeskop.

En d’r wit went d’r op joe-toeëp noa t leedje “Mansluij mit kepkes” van d’r Paul en d’r Leo kiekt en loestert, da wit d’r dat de prinsekap wiechtig is. V’r hant ‘t vérke lotte ligke wie ‘t loog en hant d’r Sjeng gezag datte werrum de sigaar is. Mé um ‘t vuur d’r erme kloeët ee bietje leuk te hoate, sjpilt d’r t sjpélke geweun mit. Went ozze prissedent d’r Wiellie um oetreupt da kiekt d’r wie inne pas gepopde uul en sjreit d’r uch de longe oet gelief: mit ee twieë kreftig: Sjeng d’r Ieësjte Alaaf.

Da hant v’r dat i jiddesgevaal wér vuur ee joar hinger os.
Zoeë wie ummer hant v’r veul artieste va d’r eege klei, inne taofeldriener mit inne lame poeët en zoeë doof wie ing kow. Party Land d’r wit wal dé van die witte zeile uever get peul getrokke zurgt dat v’r wér druuëg kinne sjtoa.

D’r Henk van ’t patternaat, dé os ummer geweldig ongersjeunt, zurcht vuur soep en bruuëdjes. En neet te vergeete de stichting buuetgerichwirke die os mit de fenninge hulpt um dit alles meuglik te maake.

Op mondig 11 fibberwaar vuur ‘t Patternaat i Welte brent de lamp vanaaf 12.30 oer.
Zurch dasse d’r beij bis!

Oetnuëdigend

Vasteloavend Same
i samewirking mit
d’r K.K. de Woeësjbuulle- effe angesj  

PS. ee nuij inisjatief va Vasteloavend Same!
Op vasteloaves vriedig – 22.00 -01.00 oer i de tent op d’r Pankraatsplei vingt i Heele d’r primeur plaatsje va inne DJ battle onger d’r naam “128 Vasteloaves Beats in ing minuut”.

Entree: gratis en vuur nieks